काही तरी चुकतंय …

सगळं आलबेल आहे.
गिळायला अन्न, हाताला काम, राहायला घर आहे … पण काय माहित का तर,
काही तरी चुकतंय…

रोज बघावं आरशात तर छान view दिसतो, सोबतीला cosmetics चा लवाजमाहि असतो…
या टापटीप चेहऱ्यावर हसू असलं, तरी मनात काहीतरी सलतंय … काय माहित का तर,
काही तरी चुकतंय…

बोलावं कि नको - मन आणि डोकं भांडतायत,
बोलल्यावर  बघितलं ना काय झालं ? असा प्रश्न करून  डोकं मनाला गप्प करतंय…
काय माहित का तर … पण काहीतरी चुकतंय…

कुणाचं काही बिघडवलं नाही मी, मग  माझ्याच वाट्याला का हे सगळं येतंय
मी माझी मज्जेत असते - हेच का या जुलमी लोकांना सलतंय ?
राग या परक्यांचा आपल्यांवरच  काढतेय … काय माहित का तर,
काही तरी चुकतंय…

बदलावं बदलावं म्हणून स्वभावाला अंकुश लावलेत , नंतर त्रास नको म्हणून आधीच काही लोक दूर सारलेत
ती वाट वाकडी म्हणून रस्ते हि बदलले, politically correct राहावं म्हणून असं काय काय चाललंय …
(म्हणूनच कि काय ?) पण तरीही …
काय माहित का तर … काहीतरी चुकतंय …

जगतांना जगून घ्यावं - आजचा दिवस शेवटचा असं  समजून चालावं
मनमोकळ हसावं आणि ढसाढसा रडावं
कळतंय सगळं ..  अगदी सगळं. तरीही घोडं कुठे अडतंय …
काय माहित का तर … पण राव, काही तरी चुकतंय …  काहीतरी चुकतंय …